إثبات السكن
واللى قولنا لازم يكون وصل حديث ل ( غاز او كهرباء او مياه او تليفون او عقد ايجار موثق بتاريخ قديم )باسم الاب او الام
طيب لو حضرتك فى بيت عيلة وكل الوصلات باسم الجد يبقى لازم وضرورى بطاقة ولى الأمر تكون على نفس عنوان الجد وتكون بطاقة سارية
إثبات السكن من جهة العمل لا يعتد له العنوان الاكيد المدون ببطاقة الرقم القومى لولى الأمر
طيب هاتقولى عقد استضافة اقولك لا يصلح و يبقى لما يقبل ابنك تروح تاخد جواب من المدرسة وتروح لشيخ الحارة بالقسم التابع لحيكم وهو يثبت انك مقيم في العنوان
فى حالة ادراج عنوان غير حقيقى وليس له مستند اثبات سكن لن يقبل ملف ابنك
لييييييييه كل الكلام ده على مستند اثبات السكن
اولا يجب ان تكون المدرسة قريبة من سكن الاطفال بحيث يسهل الوصول اليها و عادة ما يوصي بالا تبعد المدرسة عن مسكن الطفل اكثر من 300 متر
ثانيا لما حضرتك بتكتب عنوان صحيح فانت شخص امين على طفلك لان لما بتحصل مشكلة ونحب نراسل ولى الأمر بيرجع بعدم الاستدلال على العنوان فالافضل دقة البيانات وحاليا السجل المدنى لو غيرت عنوانك ولم تحدث البطاقة تدفع غرامة
ثالثا لما حضرتك بتضرب عقد انك جنب المدرسة لان سمعة المدرسة كويسة فانت بتجور على حق طفل تانى ساكن فعلا جنب المدرسة ولكن سنه اصغر فيتحدف فى مكان بعيد
رابعا هناك اولياء امور كثير مغتربين من محافظات أخرى وتلاقيه مقدم لطفله في محافظته وعلشان السن هناك اكبر يجى يضرب عقد وياخد حق ابنك وطفله يتقبل ولا يحضر المدرسة اصلا يبقى لازم تكون من ابناء المحافظه
انتوا بتوزعوا الاطفال على التجريبيات البعيدة ارد واقولك المرحلة الاولى بنوزع الاطفال حسب السن جنب بيتهم وعلشان نعمل مرحلة تانية وثالثة بستنى الفراغات للأطفال الغير مسددين المصروفات وفراغات يعنى كل مدرسة فيها مكان واحد او 5او6 وبوزع حسب الأماكن المتاحة وليس على عنوان الطفل وده قانون التجريبيات يوزع على اقرب روضة تقبل سنه
ارجو اكون افدتكم وانى مطولتش عليكم صباحكم معطر بذكر الرحمن
ولو عجبك البوست متنسوش شير خلى الكل يستفيد